domingo, 11 de enero de 2015

Xixón necesita un Muséu d'Arte





Xixón necesita un Muséu d'Arte


V
ista la impresionante esposición temporal de Mariano Moré nel Muséu Xovellanos bona idea sedría allugala permanentemente en Xixón. Pero la política d'un muséu de pintura pa cada artista de forma esperdigada pela ciudá nun ye acertao. El Muséu Valle ta mui lloñe del centru y requier gastar una tarde entera pa dir velu. El de Piñole ye una gran colección pero queda amenorgada al esponese nesa casina-xalé de La Puerta la Villa. El Barjola ye interesante (non tanto la obra del edificiu) pero ver sólo los cuadros d'él resulta monótono. La Casa-muséu Xovellanos tristemente nun ye tala sinón más bien un amestáu inconexu d'esposiciones efímeres, sales temporales, pequeñes amueses, legaos y el retablu de Miranda, probemente encaxonáu nun cuartucu del últimu pisu. La descomanada y vanguardista obra de Navascués tampoco pinta bien ocupando l'espaciu de lo que fora el salón-comedor de los Xovellanos. La Casa Xovellanos debería ser un verdaderu muséu del ilustre asturianu, un muséu dedicáu por completo a la so vida, obra y época hestórica: un gran Muséu de Xovellanos y de la Ilustración Asturiana. El Revillaxixéu tien más variedá pero la pintura moderna nun encaxa bien espuesta dientro d'una arquitectura medieval: a veces llamen más l'atención les llabraes puertes y ventanes del palaciu que dalgunos cuadros. Por too ello Xixón necesita un gran muséu d'arte que reaxunte toles colecciones xixoneses actualmente espardíes y desconexes pa ordenales nun solu muséu importante, bien cronolóxicamente o por etapes artístiques o tamién por autores, pero que diera al públicu una idea global del arte, na so evolución y nes sos influencies o corrientes artístiques, y que reflexe too ello la gran bayura pictórica que tien la ciudá y que munchos ignoren. Ayuntamientu y Goviernu Asturianu habríen acordar el xuntar los sos museos y non xestionalos y promocionalos caún por separtao. Esti gran Muséu d'Arte de Xixón (MAXI) tien que ser un símbolu y una marca pa la ciudá. La ubicación ye importante. Hai que recuperar el vieyu Conventu de les Agustines Recoletes como espaciu cultural onde al so llau, un gran solar xunto con  San Eutiquiu, el meyor sitiu simbólicu pa qu'un arquitectu asturianu faiga esa xoya que la ciudá merez: un únicu y gran Muséu d'Arte antigu y modernu pa Xixón.


Xaviel Vilareyo



No hay comentarios:

Publicar un comentario