Pelayu, una ópera asturiana

Pelayu, una ópera asturiana

El primer rei d’Asturies, Don Pelayu, foi la inspiración artística pa crear en 1857 l’argumentu de la última ópera dramática del compositor yaltamuranu Xaverio Mercadante. La ópera Pelayu estrenóse con éxitu un 13 de febreru de 1857 nel Teatru San Carlos de Nápoli con llibretu de Marco d’Arienza y col barítonu Filippo Coletti. Pero la fama de Mercadante viose pronto superada poles óperes del parmesanu Giuseppe Verdi dotaes éstes d’una carga política de nacionalismu italianu que les fizo dominar llueu nos repertorios, polo que les óperes de Mercadante cayeron depués nun incomprensible y llargu olvidu.

La ópera Pelayu cuenta en cuatro actos el drama políticu y personal del héroe nacional asturianu Don Pelayu que regresa a la so casa de Xixón depués d’un tiempu pa descurbrir que la fía suya Bermisinda (Bianca) va casase con Munuza (Abdel) governador musulmán de la ciudá. La ópera, ambientada en Xixón nel añu 718, escomienza con un cantu de Don Pelayu a Xixón y a Asturies: “Oh sospirada Xixón yo salúdote! Equí l’amor de padre y de la patria llendó los mios primeros pasos. Nos montes de les Asturies vive y aliméntase inda más la mesma llama encesa d’un valiente”. Los reproches de Pelayu a la fía por namorase d’un instrusu musulmán són de gran guapura; pero l’amor de Bianca por Abdel ye sinceru y ella enfréntase a un conflictu ente l’amor carnal y l’amor paternu y Pelayu desafía l’autoridá d’Abdel qu’impón por decretu l’islamismu. Mentantu prepárase na biesca del monte la rebelión de los asturianos contra la tiranía del moru y Pelayu que llega nun barcu pa xuntase al pueblu armáu ve cómo ésti-y ofrez con respetu un cascu, escudu y  espada y cómo lu proclamen rei pa guialos na llucha de lliberación de la patria: “Sé’l nuestru rei y nós honrarémoste con brazos y corazón pola patria”. Pelayu recuerda con sentimientu la fía perdida, casada con Abdel, y acepta afirmando que si Dios-y da fuerza la so espada sabrá llimpiar la vergoña de tou un pueblu. Declaren la guerra al moru y Pelayu llama a la victoria proclamando: “Oh mio patria, suelu natal, la to fe nun caerá y col  mio reinu comenzará a rellumar más bella”. Pero Abdel acusa a Bianca de traición y ésta desesperada suicídase cuando Pelayu col so exércitu asalta’l palaciu xixonés d’Abdel pa ver morrer nos sos brazos a la so fía que-y pide perdón.

La ópera, anque nun reflexa la historia real d’Asturies yá que la fía de Pelayu nunca casó col governador moru de Xixón sinón col futuru rei Alfonsu I, espón los típicos conflictos del Romanticismu centraos nuna xoven muyer: los amores contrapuestos y enfrentaos ente’l maríu y el padre dientro d’una guerra o llucha de lliberación de los patriotes asturianos frente a una dominación estranxera y musulmana. L’argumentu nun yera nuevu pa Xaverio Mercadante pues él yá compusiera otra ópera de temática asturiana titulada La solitaria de les Asturies, estrenada el 12 de marzu de 1840 nel Teatru La Fenice de Venezia onde apaez tamién el personaxe de Don Pelayu, ópera basada notra ópera homónima y anterior del compositor napolitanu Carlo Coccia estrenada en Milano en 1838. Esta ópera desarróllase nel monte y biesques d’Auseva cerca de Cangues d’Onís nel 716 onde vive una misteriosa y solitaria muyer que curó a Pelayu d’unes feríes y de la qu’ésti se namora. Ante l’anunciu d’una inminente invasión mora d’Asturies la Solitaria prediz que Pelayu va ser el salvador d’Asturies y que’l cielu lu protexe.

Xaverio Mercadante (Yaltamure, 1795 – Nápoli, 1870) compuso unes 60 óperes tan impresionantes como les de Bellini o Donizetti pero nun algamó la fama internacional d’éstos. Creó un estilu propiu y orixinal suprimiendo cabaletes aceleraes al final de les aries, curiando la orquestración con formes más llibres y un cantu menos virtuosista o extravagante faciéndolu más modernu que Verdi imitará. En Pelayu la orquestra adáptase maxistralmente a los diálogos y a la trama teatral reflexando violencia o tenrura, contrastando momentos d’enerxía dramática colos de tienru lirismu onde la flauta, instrumentu favoritu suyu, destaca con dulzor.

La ópera Pelayu rescatóse del inxustu escaezu pol director xixonés Mariano Rivas que la estrenó n’Asturies el 9 de setiembre del 2005 nel Teatru Dindurra de Xixón anque en versión conciertu. Gracies a ello el festival de Martina Franca tornó representala en 2008 y el sellu xenovés Dynamic edítala en discu per primer vez en 2010. Bien taría que se representara n’Uviéu.