domingo, 3 de julio de 2011

La repueblación y espansión del Reinu d'Asturies

A partir del reináu d’Ordoñu I el Reinu d’Asturies entama un procesu d’espansionismu hacia’l sur más p’allá de les llendes orixinaries del estáu. Esta ocupación de nueves tierres enxartada nuna dómina que se conoz como la Repoblación, consistía na colonización y organización del nuevu y llongu espaciu situáu al sur del cordal asturianu, rexenerando social y económicamente unos territorios que quedaren ermos y abandonaos abenayá. La Repoblación d’estos nuevos territorios foi motivada por una riestra de factores como’l crecimientu poblacional producíu nes tierres del norte que favoreció cierta presión demográfica dica’l sur y tamién foi debío a la bona calidá de les tierres de la meseta del Dueru pal cultivu los cereales, actividá esencial na economía del reinu asturianu.
Los territorios al sur del cordal quedaren prácticamente despoblaos llueu de les campañes d’Alfonsu I y pa conquistalos y anexionalos al reinu bastaba con ocupar la tierra y los solares de los antiguos allugamientos abandonaos que n’algunos casos como Astúrica, Lleón o Zamora disponíen de bonos sistemes defensivos y d’ablugu de gran interés estratéxicu y defensivu pa los nuevos puebladores.
Asina, nel añu 854 ocúpase Astúrica y nel 856 ye’l propiu rei Ordoñu I el que repuebla oficialmente Lleón, allugamientu ésti que yá s’intentara repueblar n’época de Ramiru I , y que’n pocos años ablugará nes sos muries a la propia Corte asturiana.
Con Alfonsu III el Grande llévase a cabu la segunda gran etapa repuebladora. La llinia del ríu Dueru va convertise con Alfonsu III en frontera natural ente’l mundu islámicu y el reinu astur, avanzando la ocupación pel occidente tamién hasta’l ríu Mondego onde se restauren ciudaes como Braga, Porto, Cuímbra...
Nel centru, la llinia del Dueru ocúpase nel añu 889, reforzándose esta fastera cola repueblación d’enclaves estratéxicos como Zamora, ocupada nel añu 893 y Toro nel 899.
La zona oriental del Dueru repuéblase más tardío llegando a ella nel añu 912, cuando s’ocupa San Esteban de Gormaz y otros enclaves orientales.
El sistema d’ocupación y repueblación de los territorios nuevos facíase mediante presura, o ocupación llibre y espontánea de tierres ensin dueñu que llueu se sometíen a roturación y escaliu. Col tiempu solía pidise una confirmación de la Corona que certificara oficialmente esta propiedá.
Les repueblaciones podíen llevase alantre mediante diverses modalidaes según quién les realizara. En primer llugar destaca la repueblación oficial promovida pola propia Corona y pol monarca en persona que toma solemnemente en posesión el llugar, como ye’l casu d’Ordoñu I al tomar Lleón. Tamién dalgún miembru de la Corte podía tomar posesión física de les tierres en nome del rei “cum cornu et albende rege” (col cuernu y cola bandera real) como por exemplu se fizo n’Astúrica, tomada destamientre pol Conde Gatón. En segundu llugar, les repueblaciones podíen llevales alantre los ricos homes o magnates del reinu, lo mesmo laicos que sobremanera, eclesiásticos. Y en tercer llugar esistió una repueblación particular y privada, exercida de forma espontánea por persones vinculaes ente sí yá se tratara de families enteres o de grupos lligaos a una orde relixosa.
El tipu d’allugamientu más común yera l’aldea o la villa, como se la noma nos documentos y tamién abonden los pequeños monasterios qu’a diferencia de los allugamientos laicos, esploten la tierra de forma comunitarista.

El movimientu colonizador y migrador dica’l sur va tener un doble efectu: per un llau va provocar un amenorgamientu de los llazos de parentescu que xuníen les sociedaes xentilicies del norte, favoreciendo la independencia del individu respecto al grupu, asina como’l pasu de la familia estensa a la familia nuclear como base de la organización social. Les grandes estensiones de terrén pal cultivu favorecerán l’allugamientu d’un importante númberu de llabradores llibres ensin vínculos de dependencia colos grandes propietarios o señores. Esti predominiu d’homes llibres tanto na colonización interior y esterior del reinu asturianu ye pareyo a la cuásique desaparición de la esclavitú nel so sistema productivu. Al empar, atopamos con una nueva aristocracia laica y sobremanera eclesial que dende’l sieglu IX va dir ametiendo grandes fortunes territoriales y mayor poder. Esta política repobladora llevada alantre pola Monarquía asturiana como una política d’estáu continuada a través de los sucesivos reis tien grandísima importancia polo que tamién supunxo de revolución social, al terminar dafecho con tol sistema de producción esclavista, típicu del mundu antigu romanu y visigodu, permitiendo con ello l’escomienzu de la transición al sistema feudal y estamental, característicu de la Edá Media.
El sieglu X marca l’orixe d’un datu novedosu: el surdimientu nel mapa políticu d’un nuevu estáu independiente y soberanu esgayáu del Reinu Asturlleonés, el conocíu primero como Condáu de Castiella que depués s’autocalificará como reinu, y que promoverá constantes hostilidaes y guerres contra’l Reinu Asturlleonés hasta la definitiva xuntura de los dos estaos.
En terminando los enfrentamientos bélicos, tanto entre cristianos como frente a los musulmanes, los principales núcleos habitaos pel norte del Dueru y pela Estremadura sur esperimenten un desenrollu na vida urbana, favorecida por constantes aportaciones de población diverso allugada de manera cada vez más concentrada nos grandes núcleos cívicos que al empar diben desenrollando una nueva vida urbana y comercial consolidada yá nel sieglu XII que motivó l’alitar de les ciudaes-conceyu, entidaes de población necesitaes d’un ordenamientu xurídicu o lleis propies de goviernu qu’encalzaren y solucionaren les cada vez más complexes y estreches relaciones y manifestaciones de la vida comunitaria y ciudadana.
L’otorgamientu de les llamaes cartes puebles o fueros a les villes destacaes supón el so reconocimientu como entes de relevancia ciudadana qu’exercen la so influencia vital y económica nun territoriu más o menos ampliu y llendáu poles tierres circundantes o alfoz del conceyu onde’l fueru promulgáu tendrá tamién aplicación y vixencia.
Xaviel Vilareyo y Villamil

No hay comentarios:

Publicar un comentario