Historia y signu de la bandera d'Asturies

Historia y signu de la bandera d’Asturies

Xaviel Vilareyo y Villamil

La bandera histórica d’Asturies como tolos asturianos yá saben ye azul cola Cruz de la Victoria de Pelayu nel centru en mariellu. La Cruz de la Victoria ye una xoya del pre-románicu asturianu, guardada na Cámara Santa de la Catedral de San Salvador d’Uviéu y convertida en símbolu d’Asturies. Trátase d’una cruz llatina de madera de carbayu cubierta d’oru y piedres pervalioses. Tien los brazos enanchaos pelos llaos y un pequenu relicariu nel so centru de xuntura que ye un círculu. Ta fecha por orfebres procedentes del reinu francu durante’l reináu d’Alfonsu III el Grande, que-yos mandó facela a principios del sieglu X como donación a la Catedral d’Uviéu, como se diz nel reversu de la cruz, xunto cola escritura en llatín "HOC SIGNO TVETVR PIVS. HOC SIGNO VINCITVR INMICVS" ("Con esti signu el piadosu ta protexíu. Con esti signu véncese al enemigu").
De los brazos de la cruz cuelguen dos lletres griegues, l’alfa y la o pequena, primera y última del alfabetu helénicu, yá que nos llibros relixosos, en concretu nel llibru del Apocalipsis, 1.8, facíase una comparanza metafórica del dios cristianu col alfabetu yá qu’aquél algamábalo too d’entamu a fin. "Yo soi l’alfa y la omega, el principiu y el fin, diz el Señor Dios, el que Foi, el que Ye y el que Sedrá. El Toupoderosu". L’alfa y la o grande (la omega amestóse depués de la omicra), son la primera y cabera lletres del alfabetu griegu y simbolicen asina el principiu y el fin d’un mundu gobernáu pol dios cristianu. Según cuenta la lleenda ye la cruz que llevó’l rei Don Pelayu na batalla de Cuadonga nel añu 722.

La cruz cristiana como símbolu real o nacional tien el so orixe nel mesmu entamu del cristianismu. L’emperador Constantinu, primer césar cristianu, adoptóla como símbolu y usóla nos escudos de los sos soldaos. La lleenda diz qu’una nueche, enantes de la griesca, Constantinu vio suañando una cruz nel cielu al mesmu tiempu qu’una voz divina-y indicaba que con esi signu vencería, in hoc signo vinces. Constantinu fizo decorar los escudos de les sos tropes col símbolu de la cruz, el Crismón, y llanzóse contra l’exércitu enemigu de Maxenciu na batalla de la Ponte Milviu, nel ríu Tíber de Roma nel añu 312. Con Constantinu d’emperador d’occidente entama una nueva etapa política col cristianismu como relixón oficial del imperiu romanu. La hestoria de Constantinu ye polo tanto asemeyada a la tradición de la cruz asturiana na batalla ganada pol rei Pelayu y la fundación d’una nueva etapa política marcada pola fundación del Reinu d’Asturies anque nel casu asturianu nun ye’l dios cristianu sinón la virxe María la facedora o mediadora de la victoria sobre los moros. La cruz foi asina, el símbolu y la bandera de guerra de los reis d’Asturies. La bandera real de Ramiru I (842-850) foi tamién una cruz collorada sobre fondu blancu. Nel reináu d’Alfonsu III el Grande cuando esti rei manda recubrir la Cruz de Pelayu o de la Victoria con piedres perguapes ye cuando más s’usa como símbolu oficial del Reinu d’Asturies, tanto nos edificios como nos documentos oficiales.

Depués de marchar la corte asturiana pa la ciudá de Lleón, la Cruz d’Asturies siguió usándose oficialmente como símbolu estatal anque col tiempu foi estableciéndose la figura d’un lleón colloráu como símbolu oficial del reinu.

Durante la Edá Mediana conservóse la idea de la cruz como símbolu d’Asturies, anque les confusiones cola cruz de los ánxeles o d’Alfonsu II entamaron a entecruzase al ser ésta’l símbolu de la ciudá y de la ilesia d’Uviéu, esto ye, del so arzobispáu. Ye por ello que la idea de la cruz como símbolu d’Asturies perdió fuerza no oficial, al perder Asturies tamién poder políticu, pero non nel maxín popular que caltuvo la lleenda de la cruz de Pelayu como actu políticu fundacional d’Asturies. Al entamar la Xunta Xeneral nel sieglu XV, l’escudu o símbolu que s’entamaba a usar nun ye la cruz de los Ánxeles nin la de la Victoria, que naquella dómina inda se confundíen, sinón un escudu cuarteáu coles armes de Lleón y Castiella y un santu grial o cáliz que ye la qu’apaez nos mapes y cartes marítimes d’Asturies de los sieglos XVI y XVII, pero los historiadores nun son quien a desplicar l’orixe d’esti nuevu emblema. Luis Alfonso de Carbayo publicó nel añu 1695 una llarga historia d’Asturies nomada Antiguedades y cosas memorables del Principado de Asturias. Nesta obra refierse a la Cruz de la Victoria diciendo que’l rei Don Alfonsu el Magnu foi tan devotu d’esta Cruz que tomó’l so retratu por insinia y armes, poniéndo-y a los llaos l’alfa y omega que son la primera y cabera lletra del alfabetu griegu, insinia antigua qu’usaron los católicos y fieles pa estremase de los herexes arrianos...y ésta ye la primer insinia y armes qu’alcontramos tener los reis porque nin hasta entós nin munchos años depués usaron otra insinia.

Nun ye hasta’l sieglu XVIII cuando resurde la idea de recuperar la Cruz de Pelayu como símbolu verdaderu ya históricu d’Asturies. La primer obra publicada que lo recueye ye’l llibru Asturias ilustrada, de Joseph Manuel Trelles Villademoros (Talarén, Navia 1685 – Madrid, 1765), nel so primer tomu publicáu nel añu 1736. L’autor dedica bonda parte d’esta obra a tratar de la historia d’Asturies y del orixe de la nobleza asturiana. Non sólo se dedica a la xenealoxía sinón tamién a lo tocante a la historia d’Asturies. Ye un intentu de querer facer una primer historia científica asturiana pero reconoz qu’anque quixera nun pudo dexar de mentar a los falsos cronicones más llexendarios que reales sobre los oríxenes de los llinaxes pa nun defraudar l’honor de munches families, cronicones que yá nesa dómina entamaben a considerase científicamente falsos. Con too, Trelles intenta facer una nueva historia d’Asturies más científica. Los trés tomos d’Asturias ilustrada tornaron reeditase nel añu 1760. Nel capítulu 36, parte primera, del so llibru Asturias Ilustrada, Trelles afirma que la ilesia y la ciudá d’Uviéu tienen por armes y divisa esta cruz fabricada polos ánxeles, poniéndose na figura que nella mesma se reconoz colos dos ánxeles a los llaos. Pero tol Principáu usa por divisa y armes suyes la cruz que llamen de les Victories que ye asemeyada de la de carbayu qu’apurría por estandarte Don Pelayu nes batalles.

Ye precisamente nuna carta de Xovellanos empobinada a Francisco Bernaldo de Quirós y Mariño de Lobera (Uviéu 1763 – Madrid 1837), V marqués de Campusagráu, coronel del reximientu de nobles asturianos, sobre’l blasón que tien que pintase nes sos banderes, onde-y respuende a una entruga sobre cuála ye la verdadera bandera d’Asturies, y onde reconoz lo axeitao del criteriu de Trelles Villademoros penriba d’otros historiadores anteriores. La carta de Xovellanos ta datada enantes de 1795 y la orixinal atópase en Madrid na Academia de la Historia. Diz asina esta carta:

“Mui estimáu amigu y señor: el deséu qu’usté me manifiesta de saber cuálu ye’l veraderu blasón que pinta’l nuesu Principáu nes sos armes, excita una dulda nunca presentada a la mio maxinación. Cuanto más pienso nella más m’almira que s’afaye ente nós esti ablucamientu. Bien sé del pocu ciñu nel que ta la ciencia heráldica. L’oxetu de la pregunta d’usté non sólo fai xusta esta espirica sinón tamién necesaria, pues tratándose de representar los nuesos blasones nes banderes del nuevu reximientu de nobles asturianos yá se ve que fuera tanta mengua inoralos como non tenelos. La opinión más antigua da por blasón al principáu d’Asturies trés o cinco sueles de zapatos, yá prietes, yá lleonaes, yá en fondu de metal o de collor. Esta opinión taba caltenida por dellos autores nos sieglos XVI y XVII y siguióla llueu Tirso d’Avilés na so obra xenealóxica de les cases d’Asturies, escrita a entamos del sieglu XVII. El padre Carbayo qu’escribió a fines del sieglu XVI y antes que Tirso d’Avilés establez otra opinión. Diz que’l Principáu d’Asturies, asina como la ciudá y santa ilesia d’Uviéu pinten por armes la famosa cruz de los ánxeles. Esta cruz pintábase en tolos llibros antiguos d’aquellos tiempos y afayábase tamién n’abondos edificios de la ciudá y del Principáu. Carbayo amesta que vio nel arquivu la ciudá un sellu de metal en dos cachos y nél la cruz con dos ánxeles nos llaos y na otra parte tien la figura del rei Alfonsu II el Castu, sentáu nel so tronu con una espada na mano y na otra’l cetru y coronáu con cercu alredor de la tiesta como suelen pintar los santos.
Esta opinión tan prestosa a la piedá satisfaz mui poco a la bona crítica. Les razones de Carbayo basten daveres pa dicir que la cruz anxélica ye’l verdaderu blasón de la ilesia y ciudá d’Uviéu, pero non que lo ye del reinu, provincia o principáu d’Asturies. Nestos puntos tengo grandes razones pa creer que Carbayo se confundió. Hai otra opinión más sofitada nel usu que na autoridá según la que’l principáu pinta por armes un escudu de cuatro cuarteles; nel primeru y caberu un castiellu y un lleón, y nel segundu y terceru dos copes o cálices. Yo tengo visto estes armes n’algunos impresos modernos.
La opinión que al mio paecer s’acerca más a la verdá ye la que’l caballeru Trelles espón nel capítulu 36 de la so Asturias ilustrada: tol principáu usa por divisa y armes suyes la cruz que llamen de les Victories. Anque Trelles nun presenta prebes pa fundar esta opinión ye al mio xuiciu la que tien más argumentos nel so favor. La cruz esculpida en dellos antiguos edificios del Principáu nun ye la de los ánxeles como creyó Carbayo sinón la de la Victoria. Asina los manifiesten les que tán sobre la fortaleza d’Uviéu y la fonte de Foncalada y les de la ilesia vieya de Valdediós, fundación de Don Alfonsu el Magnu y de Deva, fundación de Doña Balesquida, muyer de Don Bermudu II y otres qu’agora nun tengo presentes. Otru tantu se pue dicir de la cruz que se ve dibuxada nos antiguos privilexos como preben, amás de la so forme, l’alfa y la omega pendientes de los sos brazos. La forma d’estes dos cruces ye tan estremada que dificilmente pue tracamundiase por más que la impericia de los antiguos grabadores y amanuenses les tenga desfigurao. La de la Victoria ye una cruz regular floriada nos estremos de tiesta y brazos y col alfa y la omega pendientes d’ellos. Ye fácil polo mesmo estremales auquiera que s’alcuentren. Pero la forma del pie de la Cruz de la Victoria ufierta una circunstancia más digna de notase pues representa’l llargu espigón que servía pa ponela nel mástil o mangu y llevala nes batalles como seña o guión militar, lo que basta pa estremala de la cruz de los Ánxeles, y pa da-y el calter de blasón propiu de los nuesos reis como dafecho lo yera. L’alfa y omega, representaes en forma de colgadiellu per baxo los brazos d’esta cruz, caracterícenla más fondamente pues estes misterioses lletres alcuéntrense non sólo esculpíes nos antiguos edificios que tenemos citao sinón tamién dibuxaes al principiu de los privilexos de los nuesos reis y preben que nunos y otros se trataba de representar la Cruz de la Victoria y non la de los Ánxeles. Si pues probamos que nin los nuesos reis nin el nuesu principáu usaron depués, polo menos constante y dafecho, otru blasón que’l de la Cruz de la Victoria, ye claro qu’ésti ye’l so propiu, únicu y verdaderu blasón. Tamién notaremos que l’usu constante del alfa y omega nesta Cruz preba que Don Pelayu y los demás reis d’Asturies adoptaron esta insinia a imitación de los emperadores d’oriente que la llevaben por guión ya insinia principal nos exércitos, llueu que Constantino formó con ella’l so famosu lábaru y camudó a les antigues aigles romanes. Constando pues por una antigua y probada tradición que’l rei Don Pelayu, fundador de la monarquía d’Asturies, llevó esta Cruz por guión y divisa nes batalles, que como tala s’ornió guapamente nel castiellu de Gozón pol so sucesor Don Alfonsu III nel añu 916, qu’esti rei y los sos sucesores l’adoptaron por divisa y orniaron con ella yá los edificios públicos y yá los diplomes surdíos de la so autoridá nun habiendo preba alguna del usu públicu y xeneral d’otru blasón, resulta que’l verdaderu blasón del principáu d’Asturies ye la Cruz de la Victoria.
Basta, pues, p’afitar el blasón d’Asturies, indicar la insinia que los nuesos reis usaron como divisa propia, ya inda pa terminar, que ye’l más antigu blasón d’Hespaña y l’únicu que pue presentar el so tipu orixinal. Fundáu depués el reinu de Lleón, esta divisa fízose, si non, más propia, más peculiar d’Asturies.
Nel mio dictame, la forma na qu’habrá presentase habrá ser una cruz de plata dafecho copiada de la de la Victoria que s’alcuentra na santa ilesia d’Uviéu col alfa griega pendiente del so brazu derechu y la omega del manzorgu, y éstes pueden ser d’oru y too en campu azul siguiendo nesto último la opinión de Trelles. L’escudu habrá tener corona real y na so rodiada’l lema que s’afaya na inscripción de la mesma Cruz y que diz asina: hoc signo tuetur pius: hos signo vincitur inimicus.
Esto ye lo que puedo dicir a usté en satisfacción del so deséu.”

Durante la revolución lliberal de mayu de 1808, que supunxo’l fin del Vieyu Réxime y l’entamu de la edá contemporania n’Asturies, la Xunta Xeneral d’Asturies declárase soberana’l 25 de mayu, reinterpretándose a ella mesma como asamblea llegal y representativa de los conceyos y estamentos asturianos, nun reconociendo otra autoridá superior a ella nin nengún gobiernu central en Madrid. El negase a reconocer el gobiernu central en Madrid foi una especie de golpe institucional revolucionariu y suversivu, una ruptura coles instituciones centrales representaes pola Audiencia y afitaes na representatividá lexítima del pueblu asturianu y de les tierres d’Asturies yá que según les tesis de los lliberales la soberanía reside nel pueblu y non nos monarques. El presidente de la Xunta Xeneral yéralo tamién de la Real Audiencia borbónica y tenía les atribuciones de gobernador d’Asturies. La Xunta Xeneral autoconvocábase a conceyu cada trés años na sala capitular de la catedral d’Uviéu ensin necesidá de permisu o preste real. La Xunta Xeneral yera una instución d’autogobiernu d’Asturies daquella integrada yá por lliberales o ilustraos como Flórez Estrada, elexíu yá Procurador Xeneral, Martinez Marina, Conde de Torenu, Marqués de Santa Cruz, Canga Argüelles o Queipo de Llano que creíen na necesidá de reformes isntitucionales y dada esta lexitimidá xurídica van usala como argumentu pa declarar la soberanía del so gobiernu n’Asturies, firmando la paz con Inglaterra, incumpliendo les órdenes que veníen de les nueves autoridaes de Madrid y declarando la guerra a Francia y a la nueva dinastía napoleónica que se quería implantar na persona de Xosé I. Cuando la Xunta Xeneral Suprema d’Asturies entama la guerra, recluta un exércitu asturianu y tien por ello que diseñar una bandera p’Asturies, que sirviera tanto de símbolu institucional como d’insinia de guerra. La bandera nun podía ser otra que la figura de la Cruz de la Victoria sobre una tela azul, tal como dexaren afitao tanto Trelles Villademoros como Xovellanos sobre’l símbolu d’Asturies. A esta bandera amestóse-y un lema de guerra bordáu coles lletres ASTURIES NUNCA VENCIDA. La Xunta Suprema Xeneral sublevábase asina en nome d’Asturies, en nome de la soberanía del pueblu asturianu, según la teoría lliberal de la soberanía popular. La bandera asturiana de la Cruz de Pelayu tornaba otra vegada a ser símbolu d’otra entidá soberana, antaño reinu, agora principáu ensin príncipe.

Nel sieglu XIX, Fernando VII dexó afitáu oficialmente l’escudu representativu de la Xunta Xeneral d’Asturies, coincidiendo en tolo definío enriba y amestándose-y más tarde les frases llatines "HOC SIGNO VINCITUR INIMICUS" y "HOC SIGNO TUETUR PIUS", a la manzorga y a la mandrecha respectivamente.

La implantación del nuevu estáu lliberal na dómina d’Isabel II trai como consecuencia la supresión de la Xunta Xeneral en 1835 y la so sustitución por una nomada Diputación Provincial d’Uviéu. El símbolu d’esta Diputación yera igual que l’actual escudu del Principáu, anque timbráu cola corona de Príncipe d’Asturies, como afitaren Trelles Villademoros y Xovellanos nel sieglu XVIII. Hai una variante na qu’apaez l’escudu partíu, esto ye, compasiáu en dos cuarteles por una llínia vertical, tando la Cruz de la Victoria nel cuartel manzorgu y nel derechu la cruz de los Ánxeles.

Cola reinstauración de la Xunta Xeneral y la implantación del réxime autonómicu en 1980 vese la necesidá de tornar a pañar oficialmente una bandera asturiana. L’asociación cultural Conceyu Bable venía ya promoviendo y espardiendo dende 1974 les traces de la bandera asturiana tradicional, afitada por Trelles y Xovellanos nos sos escritos y formada por una figura de la Cruz de la Victoria sobre fondu azul pero ensin les lletres alfa y omega.

L’entusisamu popular pola bandera d’Asturies foi y ye pergrande, y anque nun yera nueva sí que yera desconocida pa munchos por mor del tapecimientu de tolo asturiano sufríu por culpa de la dictadura franquista. Pa los asturianos constitui una satisfacción y un arguyu d’Asturies qu’esta bandera y símbolu amás de poseyelu en vivu, cola guapura de tan grande xoya, que tuvo fecha nel añu 908, reinando Alfonsu III el Grande, seya ensin dulda una de les banderes más antigues d’Europa al selo del Reinu d’Asturies yá nel sieglu IX, pues les sos primeres representaciones conocíes surden en dellos monumentos pre-románicos d’Asturies y depués nos distintos territorios del reinu astur.

Esti signu real d’Asturies que nun principìu representábase al natural, esto ye sólo la figura de la Cruz col alfa y omega grabaos sobre’l fondu de piedra y que solía llevar inscrita la lleenda, acabó, por aplicación de la heráldica, inscritu, a partir del sieglu XVIII, nuna superficie llimitada, con forma d’escudu cuadrillongu redondeáu na parte inferior y con punta en mediu la base, siendo‘l so orniamientu esterior más importante la corona real d’Asturies. Que l’escudu d’Asturies vaya timbráu cola corona real establezse, a pesar del erru que pue suponer la institución en 1388 del "Principáu d’Asturies", siguiendo l’exemplu británicu y d’otros estaos, en razón de la dignidá del vieyu Reinu d’Asturies. Namás un cambiu pue citase nel nuesu escudu a lo llargo la so historia y ye la sustitución de la corona real pola corona mural francesa nes dómines republicanes, en 1873 y de 1931 a 1937. El Conseyu Soberanu d’Asturies y Lleón tamién usó’l símbolu de la Cruz de la Victoria. Nos años de la dictadura franquista la Diputación asturiana estableció un escudu partíu formáu poles cruces de la Victoria y de los Ánxeles.

L’Estatutu d’Autonomía d’Asturies, nel artículu 3.1, establez que la bandera d’Asturias ye la tradicional, rectangular cola Cruz de la Victoria en mariello sobre fondu azul. De los brazos de la Cruz cuelguen les lletres griegues alfa mayúscula y omega minúscula, que signifiquen el principiu y el fin, la infinita estensión del dios cristianu. La lletra omega ye minúscula y non mayúscula, porque asina s’alcuentra nes inscripciones y documentos de la monarquía asturiana y nes ilustraciones mas antigues que se conocen, como les pintures de Santuyanu los Prados.

La exa vertical de la Cruz de la Victoria ta a una distancia de la vaina de mediu anchor de la bandera. Na so forma de gala o respetu, la bandera confecciónase con tafetán de seda cola Cruz de la Victoria d’oru y piedres valioses, mentantu que nos demás casos se fai con texíu fuerte de llaniella o fibra sintético, llevando la Cruz de la Victoria estampada o sobrepuesta. Na versión de la bandera pa usu distintu del so allugamientu en mástil, la Cruz de la Victoria ponse nel centru.
Na Llei 4/1990, de 19 d’avientu desarróllase la llexislación relativa al usu la bandera, asina como les sos dimensiones oficiales, collor, xeitu y llugar d’allugamientu en ceremonies públiques.

- AVILÉS, TIRSO DE: Armas y linajes de Asturias y antiguedades del Principado. Uviéu, 1956.
- CARBAYO, LUIS ALFONSO DE: Antiguedades y cosas memorables del Principado de Asturias, Madrid, 1695.
- NOCEDAL, CÁNDIDO: Obras publicadas e inéditas de Don Gaspar Melchor de Jovellanos, Madrid, 1859.
- TRELLES VILLADEMOROS, JOSEPH MANUEL: Asturias ilustrada, tomu I. Madrid, 1736.
- XOVELLANOS, GASPAR MELCHOR DE: Canto guerrero para los asturianos. Uviéu. 1811.
- ZAPICO ÁLVAREZ, FAUSTINO: La revolución de mayu de 1808. Uviéu. 2007.